Футболдан Қазақстан Премьер-лигасының алғашқы турында қызылордалық «Қайсар» өз алаңында Астананың «Жеңіс» командасын қабылдады. Бұл кездесу былтыр пайдалануға берілген «Қайсар-арена» стадионында өтті.
Ойын алдында жанкүйерлер жергілікті клубтан үлкен үміт күтті. Оның себебі де жоқ емес. Қызылордалық команда елімізде алғашқы болып жеке инвестордың қолына өтті. Жаңа басшылық клуб алдына жүлделі орындардың біріне ілігу және Қазақстан кубогына қол созу міндетін қойды. Сондықтан олар алдымен бас бапкерді ауыстырды. Бұл қызметке қазақстандық маман Андрей Ферапонтов келді.
Команда басшылығы өткен жылғы құрамнан қақпашы Нұрымжан Салайдин, қорғаушы Темірлан Мұрзағалиев пен Әділет Кеңесбек, жартылай қорғаушы Айбол Әбікен мен Думан Нәрзілдаев, шабуылшы Нұрдәулет Ағзамбаевпен келісімшарт мерзімін ұзартты. Сондай-ақ команда құрамына шетелден жаңадан қақпашы Адам Ковач (Словакия), қорғаушы Никола Цуцкич (Сербия), шабуылшы Томас Джонс (Чили) келді. Оған қоса қазақстандық қорғаушы Нияз Ыдырысов, жартылай қорғаушы Сағи Совет, шабуылшы Алияр Мұхамед алдағы маусымда қызылордалық клуб сапында ойын көрсетеді.
Дегенмен бірінші турдағы ойынға нигериялық Виктор Мозес пен Имо Эзекил қатыса алған жоқ.
Кездесу барысында алғашқы минуттан қос команда тарапынан толассыз шабуыл өрбіп жатты. Әсіресе, қызылордалық футболшылар жылдам гол соғу мүмкіндігін іздеді. Қарсыластар қақпасы маңында жиі бой көрсетіп, ұрымтал сәтті күтті. Шабуыл шебінде Нұрдәулет Ағзамбаев, Томас Джонс, Айбол Әбікен ойнаса, қақпаны Нұрымжан Салайдин күзетті. Қорғаныс және жартылай қорғаныс шебі Сағи Совет, Әмір Мұхаммед, Әділет Кеңесбек, Бақдәулет Көңлімқос, Никола Цуцкич сынды футболшыларға сеніп тапсырылды.
Жерлестеріміз шабуылға көбірек шыққанымен қарсылас қақпасынан саңылау таба алмай жатты. Кейбір сәтте қызылордалық футболшылар көздеген нысанадан мүлт кетсе, енді бірінде елордалық қорғаушылар тосқауыл қойды. Ойынның 43-минутында әуелете берген допты Әділет Кеңесбек голға айналдыра білді.
Екінші кезеңде астаналық команда таразы басын теңестіруге ұмтылды. Нәтижесінде 84-минутта олардың тарапынан ұйымдастырылған шабуылдың бірінде «Қайсар» сапынан Нияз Ыдырысов өз қақпасына гол соғып алды. Осылайша қарсыластар 1:1 есебіне қанағат білдіріп тарасты.
Енді жерлестеріміз алдағы ойынын 16 наурызда өз алаңында елордалық «Астана» командасына қарсы өткізеді.
Әділжан ҮМБЕТ,
