БАҚ өкілдерінің кәсіби мерекесі қарсаңында Жалпыұлттық социал-демократиялық партиясы облыстық филиалының ұйымдастыруымен «Аймақтағы интернет-журналистиканы дамыту мүмкіндіктері және медиа саланың өзекті мәселелері» тақырыбында дөңгелек үстел өтті.
Жиынға өңірдегі басылымдар мен телеарналардың бас редакторлары, республикалық ақпарат құралдарының аймақтық тілшілері, тәуелсіз авторлар мен жас журналистер қатысты.
Дөңгелек үстел басында БАҚ өкілдері өзара пікір алысып, медианың бүгінгі беталысы, өңірлік журналистиканың бағыты, журналистердің әлеуметтік мәртебесі төңірегінде сөз қозғады.
ЖСДП Қызылорда облыстық филиалының төрағасы Нұрбек Дәуренбеков басқосудың басты мақсаты өңірлік БАҚ-тың өзекті мәселелерін ашық айтып, оларды шешу жолын бірге ойластыруға бағытталып отырғанын атап өтті.
– Аймақтағы интернет-журналистиканың дамуына техникалық және материалдық базаның әлсіздігі, контент сапасының біркелкілігі, кәсіби даму мүмкіндіктерінің жетіспеушілігі және тәуелсіз медиажобаларға қолдаудың жоқтығы кедергі болып отыр. Біз бұл мәселелерге бейжай қарай алмаймыз. Журналистер үшін жүйелі оқыту курстарын ұйымдастыру, цифрлық медианы дамытуға арналған бірлескен жобалар жасау, редакциялар арасында ынтымақтастықты арттыру, сондай-ақ тәуелсіз бастамаларға құрылымдық қолдау көрсету бүгінгі күннің нақты қажеттілігіне айналып отыр. Жергілікті журналистиканың дамуы үшін нақты қадамдарға баруға, әріптестік орнатуға және бірге жұмыс істеуге дайынбыз, – деді ол.
«Qyzylorda» телеарнасының бас редакторы Айнұр Тұңғышбаева журналистика саласындағы өзекті мәселелерді жеке-дара емес, бірлесе көтерудің тиімді нәтиже беретінін айтты. Сондай-ақ бүгінгі медиакеңістіктегі кейбір көңілге қонбайтын мәселелерге тоқталды.
– Қазір ChatGPT, яғни жасанды интеллект арқылы дайындалып жатқан ақпараттардың бірсарындылығын байқауға болады. Бұл – тек стилистикалық мәселе емес, журналистік жауапкершілік пен авторлық ұстанымның әлсіреуіне апаратын жол. Дұрысы, мұндай тәсілдерден бас тартып, жазуға деген адалдықты, ар-ожданды оятатын көзқарасты күшейту қажет. Түптеп келгенде, ЖИ қызметі қуанатын жетістік емес, керісінше, кәсіби журналистің қалыптасуына кедергі келтіреді, – деді.
«Ұстаз мәртебесі» газетінің және «Әлімсақ» журналының редакторы Нұрлан Көбегенұлы өңірде ғана емес, жалпы қоғамда журналистердің мәселесі өте өзекті екеніне тоқталды. Осы орайда әлеуметтік саланың бір өкілі ретінде олардың мәселесін депутаттар мінберден көтеру керектігін айтты. Тек ақпарат алуға қатысты емес, журналистің әлеуметтік мәселелері, яғни жалақысы, баспанасы, мәртебесі де назардан тыс қалмауы керек екенін атап өтті.
– Бүгінде медиада орта жастан асқан, өз ісіне адал жандар ғана қалып отыр. Ал жастар неге келмейді? Себебі, салада қаржылық тұрақтылық жоқ. Егер жастар еңбегінің әділ бағаланатынына сенсе, осы саладан орын алар еді, – дейді ол.
Жиында талқыланып отырған тақырыпқа қатысты «31 арнаның» аймақтағы меншікті тілшісі Абай Нұржанұлы, «Казахстанская правда» газетінің меншікті тілшісі Әлібек Байшүленов пікірлерін білдіріп, айтылған мәселелердің нақты шешімін табуы үшін БАҚ өкілдері арасында тұрақты байланыс болуы қажеттігін айтты.
Ғазиза ӘБІЛДА
