Облыстық қоғамдық даму басқармасының ұйымдастыруымен «Көрнекі ақпарат мәселелері» тақырыбында семинар өткізілді. Онда өңірдегі көрнекі ақпарат пен жарнама мәтіндерінің мемлекеттік тілдегі сауатты қолданылуы, заңнама талаптарының сақталуы талқыланды. Жиынға А.Байтұрсынұлы атындағы Тіл білімі институтының мамандары қатысып, өңірдегі тіл саласына жауапты өкілдермен өзара тәжірибе алмасты.
Семинарды облыстық қоғамдық даму басқармасы басшысының орынбасары Уәлихан Ибраев кіріспе сөзбен ашып, мемлекеттік тілдің мәртебесін арттыру мен оның қоғамдық кеңістіктегі қолданылу сапасын көтеру бағытындағы жұмыстардың маңыздылығына тоқталды.
Жиында «Халықаралық «Қазақ тілі» қоғамы» қоғамдық бірлестігінің Қызылорда облыстық филиалы мен басқарма арасында ынтымақтастық туралы меморандумға қол қойылып, алдағы ортақ жұмыстардың бағыттары айқындалды.
Облыстық қоғамдық даму басқармасының тілдерді дамыту және ономастика бөлімінің басшысы Ә.Әлиева «Қызылорда облысындағы көрнекі ақпараттың жай-күйі туралы», А.Байтұрсынұлы атындағы Тіл білімі институты әлеуметтік лингвистика бөлімінің меңгерушісі, филология ғылымдарының кандидаты Г.Исаева «Жарнама мәтіндер ішкорпусы: көрнекі ақпаратты зерттеудің жаңа мүмкіндіктері», Алматы қалалық ішкі саясат басқармасының бас маманы А.Нұрғазы «Қазақстан Республикасы Тіл туралы заңнамасы талаптарының сақталуы», Қорқыт ата атындағы Қызылорда университетінің профессоры, филология ғылымдарының кандидаты А.Абасилов «Мемлекеттік тілдің көрнекі ақпарат пен жарнама саласындағы қызметі» тақырыптарында хабарлама жасады.
Ә.Әлиева өз баяндамасында мемлекеттік тілдің қолданысы аясында заң талаптарының сақталуын қамтамасыз етуде жыл бойы облыс орталығында және аудандарда көптеген ақпараттық, насихаттық іс-шара атқарылғанын атап өтті.
– Мемлекеттік тілдің кеңінен қолданылуын қамтамасыз ету бағытындағы жұмыстар бойынша заңнама талаптарына енгізілген өзгерістер туралы «AMANAT» партиясы жанындағы азаматтық қоғам мен мәдениетті дамыту жөніндегі «Мирас» аймақтық кеңесінің отырысында, облыстық кәсіпкерлер палатасы жанындағы білім саласы және әлеуметтік кәсіпкерлік, сауда қызметін көрсету, туризм салалық кеңесінің бірлескен отырыстарында ақпараттандырылып, тіл мәселелері тұрақты қаралып келеді, – деді ол.
А.Байтұрсынұлы атындағы Тіл білімі институты өкілдері көрнекі ақпараттар, көше бойына жарнама орналастыруда көптеген қиындық туындайтынын, әйтсе де кез келген мәселе ҚР Тіл туралы заңының аясында мемлекеттік тілдің мәртебесіне сай шешімін тауып отырғанын айтып, тәжірибесін бөлісті.
Жалпы семинарда мемлекеттік тілдің қолданыс аясын кеңейту, көрнекі ақпараттарда мемлекеттік тілді қолдануда заң талаптарын сақтау, сала базасындағы статистикалық деректер мен есептілік сапасын жетілдіру мәселелері талқыланды. Сондай-ақ облыстағы мемлекеттік тіл саясатын жүзеге асыру, тілдерді дамыту бағытында нәтижелі жұмыстар атқарып жүрген сала мамандары марапатталды.
Ғазиза ӘБІЛДА
