Облыс балабақшалар саны жөнінен республикада Түркістан, Алматыдан кейін үшінші орында. Мемлекеттік тапсырыспен жұмыс істейтін 577 мектепке дейінгі ұйымда 45391 бала тәрбиеленуде. Ал 374 жекеменшік балабақшада 26 мыңнан астам бала бар.
Жасыратыны жоқ, кейінгі кезде жекеменшік балабақшалардың қызмет сапасына қатысты көп сын айтылып жүр. Мәселен, өткен жылы бала тамақтан уланды, оқу жылының басында кереуеттен құлады тәрбиеленуші бірнеше жерде тістелді, ыстық суға күйіп қалды. Жақында «Ералаш» балабақшасының тасымалмен айналысатын автокөлігінің жол-көлік оқиғасына ұшырауы қоғамдық пікір тудырған еді. Осыған байланысты өңірлік коммуникациялар қызметінде облыс әкімінің орынбасары Мейрамбек Шермағанбет, облыстық білім басқармасының басшысы Асқарбек Есжанов, облыстық полиция департаменті бастығының орынбасары, полиция полковнигі Ермахан Абдраманов БАҚ өкілдеріне брифинг берді.
– Ата-аналардың жекеменшік балабақшаларда көрсетілетін қызметтің сапасына қатысты көңіл толмаушылығы бар екені жасырын емес. Оқу-ағарту министрінің бұйрығына сәйкес жылына бір рет мониторинг жүргізіледі. Қағида нормаларын бұзу фактілері анықталып, акт білім бөлімдерінің ресми интернет ресурстарында жарияланды. Заң бұзушылықтарды жоюға қосымша уақыт берілді. Дегенмен, кемшіліктер толық жойылмаған және бала өміріне қауіп төнген оқиғалар болған. Қалада 44, Жаңақорғанда 24, Шиеліде 25 мектепке дейінгі ұйым мемлекеттік тапсырыс алушылар тізбесінен шығарылды. Мемлекеттік тапсырыс тоқтағанымен, балаларды қамтуға кері әсерін тигізбейді. Біздің мақсатымыз – балаларға жайлы әрі қауіпсіз орта қалыптастыру. Бала өмірін өзінің бас пайдасынан төмен санайтын кәсіпкерлерге шектеу қоямыз, – деді облыс әкімінің орынбасары.
Аймақтағы 374 жекеменшік балабақшаның 106-да немесе 28,3 пайызында тасымал ұйымдастырылған. Оның саны бұдан да көп болуы мүмкін. Бұл туралы облыстық білім басқармасының басшысы Асқарбек Есжанов айтты.
– Соңғы айларда екі рет жол-көлік оқиғасы болып, қоғамда резонанс тудырды. Осы ретте балалар тасымалымен айналысу үшін қойылатын қолданыстағы заңнама талаптары жөнінде айтқым келеді. Ішкі істер министрінің бұйрығына сәйкес, кемінде екі есігі бар, техникалық жай-күйі уәкілетті орган бекіткен талаптарға сай көлікпен, жолаушыларды және жүкті тасымалдау ережелерінде белгіленген талаптарға жауап беретін автобустармен жүзеге асырылады. Автобустар сары түсті жарқылдауық маякпен жабдықталады. Оған «Балалар тасымалы» деген таным белгісі орнатылады. Жасы кемінде жиырма бесте, тиісті санаттағы жүргізуші куәлігі және кемінде бес жыл еңбек өтілі бар жүргізушілердің тасымалдауына рұқсат етіледі. Автобус шанағында тасымалданатын балалардың саны орындық санынан аспауы тиіс. Қала сыртындағы жолдарда балаларды тасымалдайтын екі және одан да көп автобус легімен жол полициясының арнайы автомобильдері ілесіп жүруге тиіс. Тасымалдауға жетi жастан кiшi емес балалар рұқсат етiледi. Жетi жасқа толмаған балалар бiлiм беру мекемесi жұмысшыларының, сондай-ақ ата-анасымен және оларды ауыстыратын адамдармен жеке алып жүруi кезiнде ғана жол жүруге рұқсат етiлуi мүмкiн. Қазіргі жеке балабақшалардың ұйымдастырып отырған тасымал қызметі ешқандай нормативті-құқықтық актімен рәсімделмеген. Облыстық білім басқармасы жоғарыдағы заңнама талаптарының орындалуын алдағы уақытта да тұрақты бақылауында ұстайды, – деді басқарма басшысы.
Облыс әкімінің тапсырмасына сәйкес полиция департаментінің бастамасымен «Балабақша» жедел профилактикалық іс-шарасы өткізілуде. Балаларды тасымалдауды заңсыз жүзеге асырған жүргізушілер анықталып, оларға қатысты 265 әкімшілік құқықбұзушылық бойынша тиісті шаралар қабылданса, 28 көлік айып алаңына қойылып, 23 көліктің мемлекеттік белгілері тәркіленген.
Айсәуле ҚАРАПАЕВА
