Бүгін облыс әкімі Нұрлыбек Нәлібаев Қазақстан халқы Ассамблеясы төрағасының орынбасары, Қазақстан Республикасы Президенті Әкімшілігі Қазақстан халқы Ассамблеясы хатшылығының меңгерушісі Марат Әзілханов, Парламент Сенаты мен Мәжілісінің депутаттары Руслан Рүстемов, Наурызбай Байқадамов, Мұрат Әбенов, Мархабат Жайымбетов, Мұрат Ергешбаев, Аян Зейнуллин, сондай-ақ «ҚазАтомӨнеркәсіп» ұлттық атом компаниясының басқарма төрағасы Мейіржан Юсупов және «Самұрық-Қазына Траст» корпоративтік қорының бас директоры Альфия Адиеваға Президент саябағын қайта жаңғырту жұмыстарының барысын таныстырды.
Саябақтың негізі 2007 жылы қаланған,аумағы 81,85 гектар. 2024 жылы қайта жаңғырту қажеттілігі туындап, жобаны Alem Qurylys AQ серіктестігі қолға алды.
Қайта жаңғырту жобасына түзетулер енгізіліп, 300 орындық балалар лагері мен қысқы бақ сияқты әлеуметтік нысандар қосылды. Жоба бойыншабірнеше нысан мен қоғамдық кеңістіктер салу көзделген. Атап айтқанда, аллея, субұрқақ, амфитеатр, спорт, би, балалар ойын алаңдары, workout, демалыс аймақтары, фудкорт, теннис үстелдері, айналмалы дөңгелек аттракцион, тамақтану орындары, велосипед және жүгіру жолақтары, сахна, сарқырама каналдары мен олардың үстінен өтетін көпірлер, шахмат, баскетбол және футбол алаңдарықарастырылған.
Ботаникалық бақ аумағында абаттандыру және көгалдандыру жұмыстары жүргізілуде. Абаттандырылатын жалпы аумақ 2,41 гектар, бақ ішіне Оңтүстік Африка, Оңтүстік және Орталық Америка, Қытай, Жапония, Мадагаскарда өсетін жасыл желек отырғызылады.
Балалар лагерінің құрылысына 6,02 гектар жер бөлінген, бұл аумақта әкімшілік ғимарат, іс-шараларға арналған ивент-аймақ, 4 тұрғын корпус, қонақүй үлгісіндегі шағын ғимарат, 5 дәстүрлі киіз үй, ашық бассейн, стадион, футбол алаңы, сахна, өзге де демалыс және техникалық нысандар салу жоспарланған.
Астана шағын ауданынан Президент саябағына дейінгі жаяу жүргіншілер көпірінің жоба-сметалық құжаттары әзірленуде. Онда шолу алаңы, жаяу жүргіншілер жолы мен веложолдар, жапырақ пішініндегі 7 демалыс аймағы қарастырылған.
Бұдан бөлек, инвестор қаражаты есебінен «Rixos» бес жұлдызды қонақ үйі салынуда. Қонақ үйде 150 нөмір, мейрамхана, саябақ аймағы және автотұрақ болады. Сондай-ақ қасында тоғыз қабатты 15 тұрғын бой көтеріп келеді.
Қызылорда облысы әкімінің баспасөз қызметі
