«Әлемнің әміршісі – еңбек», немесе «Еңбек түбі – береке» дейді дана халқымыз. Адал еңбекке бет бұрып, нарықтық заманға сай кәсіппен ұштастырып отырған азаматтар арамызда аз емес. Шағын және орта кәсіпкерліктің кең қанат жайып, өркендеуіне мемлекет тарапынан да тиісті бағдарламалар арқылы нақты көмек-қолдаулар көрсетіліп отырғаны көңіл қуантады.
Сырдария ауданының тұрғыны Айбол Смайлов 2023 жылы «2021-2025 жылдарға арналған кәсіпкерлікті дамыту жөніндегі ұлттық жоба» мемлекеттік бағдарламасы аясында 1 380 000 теңге көлемінде қайтарымсыз грант иегері атанып, жеке кәсіпке ден қойғандардың бірі. Ол тұрмыстық химия өнімдерін, атап айтқанда кір сабын, иіс сабын және сұйық сабын шығарумен айналысады.
– 2021 жылы жұмыстан қысқарып кеттім. Отбасының негізгі асыраушысы өзім, сондықтан қарап отыруға болмайды. Содан ғаламтордан сабын өндіру кәсібі туралы көзім шалып қалды. Бұрын мұндай кәсіппен айналыспаған соң, бастапқыда қорқыныш та болды. «Тұтынушылардың көңілінен шыға ма? Бәсекелестерді қалай басып озамыз?» деп ойладық. Дегенмен сабын шығарудың қыр-сырын меңгеріп, өзіміздің тұрақты тұтынушыларымызды таптық. Ауылдағы «Көркем», «Шархан», «Лидер», «Жазира», «Престиж» секілді дүкендерде сатылады және үйден келіп алатындар да жоқ емес. Өйткені біздің өнімнің бағасы қолжетімді әрі химиясыз жасалады, – дейді ол.
Расында кәсіптен нәсіп табу оңай шаруа емес. Ол үшін ең бірінші тәуекел ете білу керек. Одан соң өнімнің сапасы мен бағасының қолжетімді болуы да маңызды. Бастысы, тұтынушы көңілінен шығу қажет. Міне, осы қарапайым қағидаларды ұстанған Айбол Сағындықұлы есік алдындағы аядай бөлмені шағын цехқа айналдырып, бір отбасыны асырап отыр. Көпбалалы әке қызының құрметіне арнап өнімдерге «Ханшайым» атауын берген.
Кәсіпкер өткен жылы «Ауыл аманаты» жобасы арқылы өндіріс көлемін ұлғайтуға және өнім ассортиментін кеңейтуге мүмкіндік алған. Бұрын сабынның түр-түрін шығаратын болса, енді оған ыдыс жуатын сұйықтық, сусабын қосылды. Бұл өнімдерді шығарудың аса қиындығы жоқ. Тоң май, өсімдік майларын қайнатып, арнайы қоспалар пайдаланады. Шикізатты Алматы қаласынан алдырады.
– Алдағы уақытта кәсіпті кеңейтіп, тың бағыт бойынша жаңашылдық енгізу ойда бар, – дейді ол. Ерінбей еңбек етіп, табанды тірлік етіп отырған көпбалалы әке, аудандағы шағын кәсіптің дамуына үлес қосып, өндірістің жаңа серпінін қалыптастыруға үлгі болып отыр.
Айсәуле ҚАРАПАЕВА
