Арал аудандық мәдениет үйінде Қазақстанның құрметті журналисі, ақын, күйші-сазгер, «Тұран» сыйлығының иегері, Арал ауданының «Құрметті азаматы» Жұмабай Жақыптың 80 жылдық мерейтойына арналған «Сөз бен саз әлемінің сардары» атты шығармашылық кеш өтті.
Расында, адам өз өмірінің сәулетшісі. Даралар да, қаралар да, даналар да қонақ болып өтетін мына дүниеде әркім өз өмір соқпағын өзі сомдайды. Оның мәнді де сәнді, мағыналы да мазмұнды болуы өмір иесінің қарымы мен қасиетіне байланысты. Міне, бүгінде сондай сүрлеуді бастан кешіп, журналистика мен руханияттың биік шыңына шыққан Жұмабай Жақсылықұлы тағылымды кештің басты кейіпкеріне айналды.
Аймаққа аты шыққан таланттың шығармашылық жолы мен өнер биігіндегі белесін бір арнаға тоғыстырған кешке қаламгердің шығармашылық жолдағы үлкен-кіші әріптестері, руханият пен мәдениетке қызмет етіп келе жатқан орта буын және түрлі саланың зиялы қауым өкілдері қатысты.
Тағылымды кеште алдымен қаламгер Ж.Жақыптың өмірі мен шығармашылығынан сыр шертетін бейнебаян көрсетіліп, ақынның өлеңдері оқылды.
Кешке арнайы қатысқан аудан әкімі Аманжол Сақыпұлы Оңғарбаев қалам мен күй құдіретін бойына дарытқан бірегей тұлғаны мерейлі жасымен құттықтап, аймақ басшысы Нұрлыбек Машбекұлының арнайы құттықтауын жеткізді. Сонымен қатар облыстың ең жоғары марапаты – «Құрмет» грамотасын табыстады.
Кеш иесі Жұмабай Жақып пен жұбайы Мария Жақыповаға арнайы құрмет көрсетіліп, иығына шапан жапты. Сондай-ақ аудан әкімінің құттықтауын табыс етті.
Рухани кеште Ж.Жақыптың аға-інілері мен қаламдас замандастары Сырдың сырлы сәлемін ала келіп, өздерінің ізгі пейілдерін, жылы лебіздерін жеткізіп, сый-құрмет көрсетті.
Олардың қатарында Қызылорда қаласы мен Арал, Қазалы, Жаңақорған аудандарының Құрметті азаматы, «Құрмет», «Парасат» ордендерінің иегері, республикалық «Жалаңтөс Баһадүр» қоғамдық қорының президенті Н.Мұсабаев, еңбек ардагері, Қазақстан Журналистер одағының мүшесі, халықаралық «Қазақ тілі» қоғамдық бірлестігінің облыстық филиалының төрағасы, республикалық «Тіл сақшысы» газетінің бас редакторы, «Парасат» орденінің иегері С.Аңсат, белгілі тележурналист, ақын, Қазақстан Жазушылар одағының Қызылорда облыстық филиалының төрағасы, халықаралық «Алаш» әдеби сыйлығының лауреаты, Шиелі ауданының Құрметті азаматы Қ.Есімсейітова, «Сыр Медиа» ЖШС-нің бас директоры М.Аралбаев және журналистика саласының ардагері, «Сыр Медиа» ардагерлер кеңесінің төрағасы К.Ерімбетов бар.
Мазмұнға толы шара соңында қаламгердің тағылымды дүниелері сомдалған төл туындысы – балалар шығармашылығына арналған «Ақ самолет, самолет» және «Көк теңіздің көз жасы» атты ертегілер кітаптарының тұсауы кесілді.
Бұл кеште мерейтой иесінің әндері мен жауһар жырлары жиналған жұртшылыққа жол тартып, рухани кештің мән-мазмұнын байыта түсті.
Арал ауданы әкімінің баспасөз қызметі
