Сыр журналистикасының ардагері, Қазақстан Жазушылар одағының мүшесі, Арал ауданының құрметті азаматы, республикалық «Егемен Қазақстан» газетінде, облыстық және аудандық басылымдарда қызмет атқарған қарымды қаламгер, бірнеше кітаптың авторы Еркін Әбіл биыл 75 жасқа келді. Мерейтой иесі Қызылорда облысының Құрмет грамотасын, Қазақстанның құрметті журналисі атағын иеленген.
Ә.Тәжібаев атындағы облыстық кітапханада ардагер қаламгермен кездесу өтті. Кездесуді Қазақстан Жазушылар одағының облыстағы өкілі, Халықаралық «Алаш» әдеби сыйлығының иегері Қаршыға Есімсейітова жүргізді. Сондай-ақ ол мерейтой иесіне ҚЖО басқарма төрағасы Мереке Құлкеновтің құттықтауын табыстап, иығына шапан жапты.
Қаламгердің әріптестері, Қазақстанның құрметті журналисі, «Сыр медиа» ардагерлер кеңесінің төрағасы Кенжәлі Ерімбетов, «Сыр медиа» ЖШС бас директоры Марат Аралбаев, бас директордың орынбасары Әзиз Батырбеков, облыстық «Сыр бойы» газетінің бас редакторы, Қазақстан Журналистер одағы облыстық филиал төрағасы Қуат Шарабидинов, «Кызылординские вести» газетінің ардагер журналисі Жанна Балмағанбетова сөз сөйлеп, мерейтой иесіне игі тілектерін білдірді.
Тілек айтушылар Сыр журналистикасының ардагері, қаламы қарымды журналист Еркін Әбілдің мерзімді баспасөз бетінде қалдырған көп жылғы қолтаңбасын, қай уақытта да тіршіліктің түйткілді мәселелерін көтеруде табандылық таныта білгенін атап өтті.
Кештің қорытынды сәтінде мерейтой иесі Еркін Аққалиұлы қаламдастарының сый-құрметіне ризашылығын білдіріп, іс-шараны ұйымдастырған облыстық кітапхана ұжымына алғысын айтты.
Кездесу барысында мерзімді баспасөздің және кітаптың қоғамдағы орны, рухани танымды кеңейтуге пайдасы туралы сөз қозғалып, ой-пікірлер ортаға салынды. «Теңізбен жаны егіз қаламгер» тақырыбында ұйымдастырылған кітап көрмесі таныстырылды.
Іс-шараға ақын-жазушылар, журналистер, кітапханашылар мен оқырмандар, №5547 әскери бөлімінің сарбаздары қатысты.
Ғазиза ӘБІЛДА,
«Сыр бойы»
