Наубайхана өндірісін жүргізіп келе жатқан Бақытбек Ербошаевпен кездесудің сәті түсті. Ол 2013 жылы шағын цех ашады. Бастапқыда 8 адам еңбек етті. Сауда дүкеніне нан өнімін пісірді. Қажетті құрал-жабдығы түгел болғанымен кәсіби маман жетіспеді.
Жұмысын одан әрі дамыту үшін кәсіпкер 2020 жылы «Қызылорда» Өңірлік инвестициялық орталығынан» жеңілдетілген несие алды. Бұл орталық – шағын және орта бизнесті қолдап, жаңа кәсіпорындар мен жұмыс орнын құруды көздейді. Өңір кәсіпкерлерінің жобасын жеңілдетілген несиемен қамтамасыз етеді. Бақытбек те орталықтың арқасында кәсібін едәуір ілгерілетті.
– Қаражатқа соңғы үлгідегі техника сатып алдық. Сапалы құралдар Ресейден, Түркиядан әкелінді. Алайда алдымыздан тағы да сол кәсіби маманның жоқтығы шықты. Бар ғой. Көпшілігі өз еркімен үйреніп алған, білімі жоқ қыз-келіншектер еді. Біз олармен ауқымды жұмысты іске асыра алмайтын едік. Уақыт өте осы салада еңбек етіп жүрген мамандарды тарта бастадық. Оларға өзіміздің тарапымыздан мүмкіндік бердік. Нәтижесінде ісіміз алға басып, шаруамыз ширады. Қазір біздің өнімдеріміз қаладан бөлек, аудандарға да тасымалданады. 100-ден аса адам еңбек етуде. Енді цех жұмысын одан әрі жандандыру үшін кең ғимарат ашуды көздеп отырмыз, – дейді ол.
Өндірістің технолог-маманы Мөлдір Құрмашова жұмыс барысын көрсетті. Қызығы, «Don Baton»-ның өніміне бір тапсырыс бергеннен кейін тұрақты тұтынушыға айналатындар көп екен.
Алып цех. Жұмыс үздіксіз жүруде. Тәтті мен нан иісі керемет. Әркім өз шаруасына мығым. Епті қолдар тәтті салынған қалыптарды пешке жылдам қойып, бір кезде қызара піскен өнімді пештен шығарды. Нан қорапқа, өзге өнімдер қапталып жатыр. Дайын өнім әп-сәтте көлікке тиеліп, дүкендерге жөнелтілуде. Міне, адал еңбектің арқасында берекелі істің шырайы осылай кіретініне куә болдық.
– Тек тапсырыспен қана жұмыс істейміз. Мұнда 6 цех бар. Алдымен нан пісіретін цехтың жұмысын көрсетейін. Бұл жерде ер азаматтар еңбек етеді. Өйткені жұмыс ауыр. Нанның бір ғана түрі – бөлке пісіріледі. Төрт пеш бар. Бір пештен 120 нан шығады. Сонда бір салғанда 480 нан дайын болады. Бағасы 90 теңге, салмағы 450 грамм. Төрт аға қызметкер бар, олар негізгі жұмысқа жауапты. Ал көмекшілер дайын қамырды қалыпқа салады. Наубайхана үздіксіз жұмыс істейді, күндізгі және түнгі ауысым бойынша. Күнделікті 10 мың бөлке өндіріледі. Сонда 1,5-2 тонна ұн қолданамыз. Ең бірінші ұнның сапасына мән береміз. Жеткізу қызметі қарастырылған. Әр цехтың қоймасы, өнімді дайындайтын орын, бәрі қамтылған, – дейді ол.
Одан кейін қатпарлы қамырмен жұмыс істейтін цехты көрдік. Мұнда круассан, печенье, бәліштер пісіреді. Тәттінің сан түрін жасайды. Бұл цехта 10 адам еңбек етеді екен.
– Барлық тәтті алдын ала дайындалып, тек уақытында пісіріледі. Осылайша тапсырыс берушіге ыстықтай жеткіземіз. Техниканың бәрі де заманауи. Қамыр илейтін, қатпарлы қамыр дайындайтын құрылғының мүмкіндігі мол. Біздің күнделікті дастарқанға, қонаққа қойып жүрген тәттілер қаншама маманның еңбегінің арқасында дайын болады. Мәселен, бір круассанның дайындау әдісі әрі құпиясы бар. Оны кез келген адам істей алмайды. Сол себепті мамандардың еңбегі зор. Өз ісінің шеберлері. Келесі цехта нанның сан түрі жасалады. Ашытқысыз нан, қара нан, батон сынды 50-ден аса түрі дайындалады. Мұнда 8 адам жұмыс істейді, таңғы және кешкі ауысымда. Бұл өнімдерге де сұраныс өте жоғары. Әсіресе, оның ішінде ашытқысыз нанға тапсырыс беруші көп, – дейді М.Құрмашова.
Цех жұмысымен танысу барысында ол бізге қызметкерлері тәжірибе шыңдап, біліктілігін арттыру үшін арнайы оқу курстарына жіберілетінін айтты. Тіпті Ресейге дейін барып, сондағы технолог мамандардан білім алып келгендер бар. Бұл үрдіс жалғаса бермек.
– Мына пеш Германиядан әкелінген, – деді енді бірде технолог-маман. – Сапасы жоғары. Өнімді жақсы пісіреді. Ал, мына цехта торт сынды тәттінің қоспасы, қамыры дайындалады. Бір сөзбен айтқанда, креммен жұмыс істейді. Бұл жерде 9 адам еңбек етеді. Торттың 5-6 түрін шығарамыз. Әрқайсысынан 40-50 шақты дайындалады. Таңғы бесте басталатын жұмыс ыстық әрі балғын өнімді уақыт оздырмай дүкендерге жеткізумен бағалы. Мәселен, Байқоңыр және оның жолындағы ауылдарға да осы цехтың өнімі барады екен. Алдағы уақытта Жаңақорғанға жеткізу ойда бар.
«Don Baton»-ның әлеуметтік желідегі парақшасы да белсенді жүргізіледі. Онда тауар туралы ақпарат тұрақты беріледі.
– Жаңа өнім шықса, міндетті түрде тұтынушыларға ұсынамыз. Ұнап жатса, тәттілер қатарына қосамыз. Сондай-ақ мұнда тағы екі цех бар. Бірінде ет, тауық еті және көкөністерден самса, қатпарлы нан сынды өнімдер пісіріледі. Бұл – үлкен цехтың бірі. Себебі онда 15 адам еңбек етеді. Жалпы 30-дан аса өнім дайындалады. Бұл өнімге сұраныс қашанда жоғары. Екінші цехта салат дайындайды. Салаттың 15-20 түрін шығарады. Дүкеннен бөлек жиын-тойларға да тапсырыс қабылдаймыз. Ал, соңғы цехта жартылай дайын өнімдер бар. Мұнда 10-нан астам түрі ұсынылады, – дейді технолог-маман.
Мөлдірдің өзі мұнда еңбек еткеніне төрт жыл болған. Алғашқыда наубайханашы болып жұмысқа орналасып, кейін алғырлығының арқасында технолог мамандығын игерді. Қарағанды, Алматы қаласында және Ресейге барып, біліктілік курсынан өтіп, білім алды.
Иә, ол кәсіпті бірден ашып, табысқа жеткен жоқ. Жобасын құрды, шаруасын бастады. Кейін «Қызылорда» Өңірлік инвестициялық орталығының көмегіне жүргінді. Жобасы қолдау тауып, қаражатқа қол жеткізді. Берілген қаржыны мақсатты жұмсады. Нәтижесінде ісі алға басып, кәсібі кеңейді. Жұмысшы қатары артты. Өнім түрі көбейді. Қысқасы, ынта-ықылас пен еңбек еңсесін көтерді.
Сара АДАЙБАЕВА
