2022 жылы облыстық көпсалалы балалар ауруханасы жанынан ашылған «Қамқорлық» оңалту орталығы бүгінде 4 мыңнан астам балаға медициналық көмек көрсетті.
Жалпы 60 төсек-орынға арналған орталықта неврологиялық, кардиологиялық, ортопедия-травматологиялық, нейрохирургиялық және туабітті сал ауруымен ауыратын, яғни оңалту ем-шарасын қажет ететін балалардың ем алуына барлық жағдай жасалған. Педагогикалық, физиотерапиялық, гидрокинезотерапиялық бөлімнен тұратын емдеу орнында реабилитолог, невролог, ортопед, травматолог, кардиолог, нейрохирург дәрігерлер, логопед, дефектолог, психолог, эрготерапевт мамандар және орта буын медицина қызметкерлері жұмыс атқарады.
Физиотерапиялық және гидрокинезотерапия бөлігінде электро ем-шаралары – магнитотерапия, электрофорез, биоптрон, емдік бассейн, құрғақ және гидрованна, механотерапия және иппотерапия бар. Кинезотерапия бөлмесі емдік денешынықтыру құрал жабдықтарымен қамтылған.
– Орталықта жылына 1200-ге жуық бала ем алады. Түрлі ем-шара бар. Мәселен, емдік бассейн жүйке жүйесін тыныштандыруға, жүрек-қан тамыр жүйесін қалпына келтіруге, тыныс алу жүйесін, бұлшықеттің жұмысын жақсартуға, артық салмақтан арылуға жақсы әсерін береді. Бассейнде бала терең тыныс алады, бұл қан айналымын жақсартып, реттейді. Оны ДЦП, сколиоз, остеохондроз, жүйке жүйесінің аноксиялық ауруларында, миодистрофия, артық салмақты балаларда жиі қолданамыз.
«Посейдон» құрғақ ваннасы – орталық жүйке жүйесін, барлық жүйке талшықтарын, бұлшықетті босатып, қан айналымын жақсартып, тыныштандыру қасиетіне ие. Организмге гидро-аэро массажды әсер береді. Бұл ваннаны жүйке, жүрек-қан тамыр жүйесі ауруларында, жарақаттан кейінгі оңалтуда, сколиоз, артық салмақ, балалар сал ауруларында қолданып жатырмыз.
«Гейзер» бальнеологиялық ванна жоғары қысымды суасты душ массажы бар. Бұл процедура бұлшықет тонусын жақсартып, метоболизмді жылдамдатып, қан айналымды жақсартады.
Сонымен қатар шунгитті кабинет бар. Ол шунгитті тастардан қаланған, емдік мақсатта көп қолданамыз. Аллергиялық, асқазан, ішек жолдары ауруларында, респираторлы вирусты ауруларда, бронхит, бронхиалды астма және психоэмоцинальді жағдайларды жақсарту кезінде, тері-венерологиялық ауруларда жиі қолданамыз.
Сенсорлық бөлме – бұл қабылдау жүйелерін, яғни иіс сезу, есту, көру, дәм сезу, есту органдарын ынталандыратын арнайы құрал-жабдықтармен жабдықталған бөлме. Демалуға, қуаттандыруға, дамытуға арналған. Арнайы жабдықтың арқасында адамның көру, есту, иіс сезімдері оянады. Бұл бөлме жүйке жүйесі зақымданған және аутистік спектрі бар балаларға жақсы көмегін береді.
Интерактивті бөлме экрандағы көрсетілген сурет ойындары арқылы баланың ойлау, көру, есту, сезу қабілеттерін дамытады. Көбінесе тіл кемістігі, аутизм, психомоторлы дамудың қалыс қалуында қолданылады, – дейді орталық меңгерушісі Алма Мұсафирова.
Мұнан басқа балалар массажы, емдік денешынықтыру, арнайы механикалық құрылғылар көмегімен тірек-қимыл аппараты бұзылған балаларды емдеуге арналған механотерапия бөлмесі балалардың сауығуына жақсы көмегін береді. Аптасына бір рет мамандардың ұйымдастыруымен топтық кондуктивтік терапия жүргізіледі. Оған орталықтағы емделуші балалар толық қатысады. Ем-шара баланың топқа үйрену арқылы эмоционалдық тұрақтылығын нығайтып, өмірге және емге деген ынтасын күшейтеді.
Мұндай орталық былтыр жазда Жаңақорған ауданында ашылып, қазіргі кезде қарқынды жұмыс істеп тұр. Онда орталық жүйке жүйесі мен тірек-қимыл аппаратында ақауы бар балалар емделеді. «Қазақстан халқына» қорының қаржыландыруымен ел игілігіне берілген орталықта 15 төсек тәуліктік стационар, 5 төсек күндізгі стационар және 30 балаға амбулаторлық көмек көрсету қарастырылған. Орталықта реабилитолог, невролог, дефектолог, логопед, эрготерапевт, механотерапевт, психолог, емдеу-шынықтыру нұсқаушылары және орта буын қызметкерлері жұмыс істейді. Мамандар Астана қаласындағы Ұлттық балаларды оңалту орталығында оқытылып даярланған.
Айнұр БАТТАЛОВА
